Home / News
Über uns
Formationen
Auftritte & Konzerte
Fotos & Aufnahmen
Tonträger
Kontakt
Links
 
 
Mini liebi Brigitte

Scho über es haubs Jahr isch’s här… u i finge ersch jetz der Muet, üsi Website z’aktualisiere.
Wie mänge schöne Momänt hei mir doch dörfe zäme erläbe! I weiss no, aus wär’s geschter gsi, wo mir beschlosse hei, dass mir zäme wei probiere im Duett z’singe.
Bin i den stouz gsi u völlig usem Hüsli! Du hesch denn gseit, Du wettisch mit mir doch de „Duftendi Veiali“ singe. U das isch de ou üses erschte Lied gsi, wo mir zäme igstudiert hei u üses erschte Feschtlied am Jodlerfescht z’Schwarzeburg.

Ich chas fasch nid beschribe, das Gfüehl, we üser Stimme sich vereint hei. Es isch für mi so öpis „Grosses“ gsi, dr Himu uf Ärde. I chas eifach mängisch geng no nid gloube, dass das nie meh wird si…
I ha so viu dörfe lehre vo Dir u vo Dire Erfahrig. Gsanglech aber ou süsch im Läbe bisch Du mir geng e grossi Stütze gsi. Du bisch immer da gsi u hesch es offnigs Ohr gha u bisch mir mit mängem Rat zur Site gstange. I bi sehr dankbar, dass sich üser Wäge gchrützt hei! Di u Dini Familie zu mine Fründe dörfe z’zeue, isch für mi e grossi Bericherig.
U de chunnt da geng wieder die Frag „Warum?“… i stoupere über üsi Liedermappe mit üsem Repertoire, de chöme mir wieder Träne u mir wird wieder bewusst, dass es das Repertoire nümme git. Es isch ou hüt no nid immer eifach zum Singe. Du bisch sehr presänt u das freut mi ou, aber es brucht eifach Zyt. Mir hei die gliche Lieder gärn gha, mir hei die glichi Istellig gha zur Sach u mir hei üs eifach gspührt im Lied.

Es isch eifach e wunderbari Zyt gsi, e Zyt, woni i mit grosser Dankbarkeit i mim Härze witertrage.  E Zyt, prägt vo wunderbare Momänte, wo üs niemmer meh cha näh…

I danke Dir für Aues, woni mit Dir u dank Dir ha dörfe erläbe!                                                       
Bhüet di Gott, liebi Brigitte, irgendeinisch da obe singe mir wieder zäme…

René